Saka leggast no ut på høyring etter stadnamnlova paragraf 8.
Har du innspel, må du sende dei inn skriftleg til postmottak@hareid.kommune.no eller per post til:
Hareid kommune
Rådhusplassen 5
6060 Hareid
Merk med «24/2171 Namnesak Øverli - Øvreli(d)»
Høyringsfristen er 28. mars 2024.
Kva skal gardane på dette biletet heite? Øverli, Øvreli eller Øvrelid?
Erlend Friestad
Grunneigar på bnr. 73/1, Geir Øvrelid, har bede Statens kartverk om å reise namnesak for å avklare skrivemåten Øverli – Øvreli(d). Han skriv at forma Øverli som står på kart i dag er feil.
Kartverket sender derfor saka på lokal høyring i kommunen, jamfør paragraf 8 i lov om stadnamn.
I tillegg til primærnamna tar Kartverket med avleidde namn i saka. Formålet er å få avklart rett skrivemåte for offentleg bruk.
Saka gjeld fylgjande namn med variantar av skrivemåtar:
- Øverli, Øvreli, Lid Øvre (gard, gnr. 73)
- Øverli, Øvreli, Øvrelid, Lid Øvre (bruk, bnr. 73/1, 73/2, 73/3 og 73/4)
- Øvrelid (grunnkrins)
Lokal høyring
Kartverket har vedtaksrett for skrivemåten av naturnamn og nedervde gardsnamn. Før Kartverket gjer vedtak, har kommunen rett til å uttale seg. Eigarar og festarar har rett til å uttale seg om gardsnamn og bruksnamn, og lokale organisasjonar har rett til å uttale seg om skrivemåten av namn som dei har særleg tilknyting til.
Saker som gjeld bruksnamn, skal eigarane få tilsende direkte frå kommunen. Det går fram av lista ovanfor kva for bruk dette gjeld.
Etter lova skal skrivemåten fastsetjast med utgangspunkt i den nedervde, lokale uttalen av namnet. Derfor ber vi om at alle som uttalar seg, opplyser kva som er den lokale dialektuttalen. Dersom namnet blir uttalt på ulike måtar, ber vi om å få opplyst dei forskjellige uttaleformene.
Hareid kommune skal no samle inn høyringssvar og sende desse til Språkrådet. Språkrådet vil så gi ei endeleg tilråding til Kartverket.