Her kan du lese alle sakspapira.

Møtet startar klokka 15 og er som vanleg ope for publikum. Det vil også bli strøyma slik at du kan sjå det direkte eller i opptak, anten her eller på Facebook.

I forkant av kommunestyret, skal det vere eit formannskapsmøte der dei skal førebu to av sakene til kommunestyret:

• Utviding av ramma for startlån
• Kva skal kommunedirektøren prioritere i budsjettarbeidet i haust

Dette møtet startar klokka 14 og blir også strøyma.

Sjå formannskapsmøtet her:

Sjå kommunestyremøtet her:

2024 - Året som gjekk

Årsmeldinga og rekneskapen skal opp til godkjenning i kommunestyret. Tala frå 2024 viser at Hareid kommune no har eit meirforbruk på over 100 millionar kroner. Denne summen må betalast tilbake før vi er ute av Robek-lista.

 Trass ein tung økonomisk ryggsekk, det største underskotet per innbyggar i fylket, og dermed mykje vekt på økonomi og innsparing, er det lyspunkt:

Økonomi og styring

• Realistiske budsjett og konkrete planar for økonomisk kontroll er utarbeidd.
• Tiltaks- og nedbetalingsplan for seks år er vedteken.
• Teikn til økonomisk balanse i 2025 etter målretta innsats.
• Sterk innsats frå både tilsette og politisk leiing.

 Tilsette og organisasjon

• Dyktige og engasjerte medarbeidarar leverer gode tenester trass i press.
• Låg klagefrekvens tyder på høg kvalitet i tenestene.
• Stabilisering i leiinga av kommunen og sektorar.

Samfunnsutvikling og bulyst

• Investeringar i infrastruktur, bustadfelt og sentrumsutvikling.
• Helsehuset har gitt betre resultat enn forventa og har styrkt sentrum.
• Reiselivssatsing har gitt nasjonal og internasjonal merksemd.
• Folketalsvekst og etablering av nye verksemder.
• Hareid vert marknadsført som den mest sentrale staden på Sunnmøre.

Barn, unge og tenester

• Styrka tiltak for barn og unge som del av bulyststrategien.
• Vekt på å sikre gode skular, barnehagar og helse- og omsorgstenester.
• Sterkt tryggleiksnett der primærtenestene støttar kvarandre.

Samarbeid og framtidstru

• Gode samarbeidsformer mellom kommune, næringsliv og frivillige.
• Positiv framtidstru og håp for den oppveksande slekt.
• Felles innsats og samarbeid vert løfta fram som nøkkelen til suksess.

Her kan du lese kommunedirektør Bent Arild Grytten si innleiing til årsmeldinga.

Her kan du lese ordførar Bernt Brandal sin tekst i årsmeldinga.

Her kan du lese heile årsmeldinga

2025 – slik gå det no

Prognosane etter tertialrapporten («førebels rekneskap») for januar–april 2025 viser

eit mogleg meirforbruk på 3,8 millionar kroner dersom det ikkje vert sett inn tiltak. Budsjettet er allereie stramt, og det er krevjande å finne rom for nye tiltak. I tillegg kan refusjonen for ressurskrevjande brukarar bli om lag 5 millionar lågare enn budsjettert, delvis grunna innføring av ein ny kvalitetsstandard i velferdssektoren.

Kommunen har eit driftsnivå som vi vurderer som handterleg innanfor dei områda vi har påverknadskraft. På finansområdet er situasjonen meir krevjande. Rentekostnadene belastar drifta negativt, då styringsrenta har utvikla seg annleis enn budsjettert. Det er usikkert korleis renta vil utvikle seg vidare, men vi må rekne med at ho ikkje kjem ned på det nivået vi la til grunn.

Sektor for Læring og Kultur melder om eit venta meirforbruk, som i hovudsak må dekkast innan eigne rammer. Samtidig er det sett i gang ei omstrukturering i sektor for Samfunnsutvikling, som kan gi positive effektar allereie i år.

Det er gledeleg at vi har fått kontroll på lønskostnadene etter fleire år med meirforbruk. Dette skuldast betre budsjettering og god innsats frå budsjettansvarlege leiarar.

Heile tertialrapporten kan du lese her.

2026 - Kva skal inn i budsjettet for neste år

Kommunestyret skal leggje føringar for kva kommunedirektøren skal prioritere i budsjettet for neste år. Når administrasjonen har desse vedtekne føringane, får dei betre tid på å utgreie konsekvensar av eventuelle budsjettiltak, og slepp å bruke tid på tiltak som ikkje kjem til å bli vedteke.  Sjølve budsjettframlegget vil ikkje vere klart før i november, men målet er å involvere både dei folkevalde, tilsette og innbyggarane i stor grad før forslaget blir lagt fram.

Dette meiner innbyggarane

Kommunestyret skal få presentert resultata frå innbyggarundersøkinga. Hovudtrekka er at dei som har svara er nøgde – og mange meir nøgde – med tenestene, men at tilliten til kommunen og folkevalde er dalande.

Her kan du lese meir om resultatet og sjå alle tala.

Omorganisering i sektor for samfunnsutvikling

Hareid kommune står i ein krevjande økonomisk situasjon og må redusere driftsnivået. Sektorane Velferd og Læring og Kultur har allereie gjennomført store kutt og treng no tid til å konsolidere drifta. Kommunedirektøren tilrår derfor at vidare innsparingstiltak i første omgang vert retta mot sektor for samfunnsutvikling og sentraladministrasjonen.

Omorganiseringa går i hovudsak ut på:

• Å flytte einingane Plan, byggesak og geodata, Næring og Kultur frå sektor for samfunnsutvikling til sentraladministrasjonen under kommunedirektøren.
• Å la einingane Kommunalteknikk og VAR, Kommunal eigedom og Hareid mottakssenter bli verande i ein reindyrka sektor for tekniske tenester.
• Å etablere eit tydelegare skilje mellom produksjon av tenester og strategisk planlegging og utvikling.
• Å gjere stillinga som kontrollar om til assisterande kommunedirektør, for å styrke leiarkapasiteten og frigi tid til strategiarbeid.

Målet er å redusere det samla ressursforbruket, med eit estimert innsparingstiltak på 1,5 millionar kroner i 2025 og 5,5 millionar kroner i 2026. Endringane inneber ikkje oppløysing av einingar eller nytilsettingar, og konsekvensane for tilsette er vurdert som marginale.

Plassane snart til sals – nye reglar for tomtekjøp

Hareid kommune har vedteke eit nytt og forenkla reglement for sal av bustadtomter, som erstattar det gamle frå 2012. Det nye reglementet skal gjere prosessen meir oversiktleg og føreseieleg for kjøparar, og legg til rette for effektiv bustadbygging i kommunen.

Ein viktig del av saka er at dei nye bustadtomtene på Plassane snart vert lagt ut for sal. Dette er eit attraktivt bustadfelt med:

• Flott utsikt og gode solforhold
• Moderne leikeplassar og trygge uteområde for barn
• Nærleik til sentrum, med kort veg til skule, barnehage og butikkar

Tomtene på Plassane vil bli selde til fastpris, basert på sjølvkostprinsippet, og vert tildelt etter offentleg utlysing. Ved fleire søkarar på same tomt, vert det gjennomført loddtrekning. Dersom tomta ikkje vert seld ved første utlysing, gjeld prinsippet om førstemann til mølla.

For å sikre framdrift i bustadbygginga, må kjøpar sende inn komplett byggesøknad innan to år – elles kan kommunen kjøpe tomta tilbake til same pris.

Høgre vil diskutere naboprat og kommunesamanslåing

Gjennom ein interpellasjon ber Hareid Høgre ordføraren ta initiativ til ein «naboprat» med nabokommunar for å diskutere mogleg kommunesamanslåing. Bakgrunnen er alvorlege økonomiske utfordringar i Hareid kommune, som i 2025 har den mest krevjande økonomiske situasjonen blant alle ROBEK-kommunar i landet – med over 106 millionar i akkumulert driftsunderskot og 1,3 milliardar i langsiktig gjeld.

Interpellasjonen viser til nasjonale signal om strammare kommuneøkonomi, aukande krav frå staten og kamp om kompetanse. Ekspert Geir Vinsand har peika på at små kommunar vil få dei største utfordringane, og at Sunnmøre har eit stort effektiviseringspotensial gjennom samanslåingar – spesielt mellom kommunar som Hareid og Ulstein.

Hareid Høgre spør:

1. Om ordføraren vil ta initiativ til eller vere positiv til ein naboprat om samanslåing.
2. Om innbyggarane i Hareid skal få seie si meining om dette i lys av dagens situasjon.

Heile interpellasjonen kan du lese her.

Artikkelen er delvis laga ved hjelp av AI-verktøyet Copilot.