Slik gjer Ulmatec og Hareid Group cruiseanløp mogleg i Hareid

Ulmatec og Hareid Group er heilt avgjerande for at Hareid no kan ta imot cruise. Gjennom samarbeid med kommunen har dei lagt grunnlaget for å utvikle Hareid som ein cruisedestinasjon.

Under den gule pullerten gøymer det seg 150 tonn med betong. Det er nok til å halde på plass store cruiseskip. Erlend Friestad

Det er Ulmatec som har ansvar for det praktiske rundt anløpet, mellom anna tryggleik og ISPS-krav. Saman med Hareid Group har dei bidrege med kai og infrastruktur som kan handtere større fartøy. Det er mellom anna bygd ein ny pullert som skal kunne handtere skip av storleiken til MS Artania. Og det er ikkje ein liten pullert som er laga til: Under bakken ligg det 150 tonn med betong - nok til å halde på plass store skip.

– Desse verksemdene har vist stor vilje til å få dette til. Dei har vore avgjerande for at vi no kan ta imot cruiseskip, seier hamnesjef Johannes Alme.

Fagleg støtte i ryggen

Å ta imot store fartøy krev grundige vurderingar.

Kystverket, ved losane i Ålesund, har bidrege med kunnskap og rådgjeving gjennom arbeidet, og vore ein viktig sparringspartnar i planlegginga.

– Det er mange forhold som må vurderast når slike fartøy skal til kai. Vi har fått god hjelp frå Kystverket, som har svara på ei rekkje spørsmål undervegs, seinast i dag har dei svara ut spørsmål frå kapteinen, seier Alme.

Byggjer vidare

Samarbeidet mellom kommunen, Ulmatec og Hareid Group stoppar ikkje med dette anløpet.

Det er planlagt fem cruiseanløp i 2027, og fleire førespurnader er på veg. Målet er å utvikle Hareid som ein attraktiv destinasjon – i tett samarbeid med næringslivet.

Derfor satsar vi på cruiseturisme

Bakgrunnen for at vi satsar på cruiseturisme, er eit ønske om å skape meir inntekter til kommunen. Vi har nytta eksisterande fortrinn på ein kontrollert og berekraftig måte utan store investeringar. Vi nyttar eksisterande infrastruktur, kapasitet og kompetanse, og har etablert eit godt samarbeid med eigarane av kaia vi skal nytte.

Vi legg mykje vekt på lokal verdiskaping. Kvar cruisegjest legg igjen om lag 800-1200 kroner lokalt, så her har butikkar og restaurantar gode moglegheiter. I tillegg ser vi at det alt har ført til fleire nyetableringar i kommunen. Dette er tilbod som også er positive alle som bur i kommunen. Også frivillige organisasjonar og andre kan skaffe seg gode inntekter ved å setje opp buer i Kjøpmannsgata under cruisebesøka.

Dei neste åra vil det også kome strenge miljøkrav for passasjerskip som skal inn i verdsarvfjordane våre. Hareid kommune ligg strategisk til utanfor verneområda og kan derfor ta imot skip som ikkje har høve til å gå lenger inn i fjordsystemet.

Cruiseskip-besøk 13. juni 2026: MS Artania

Forventa ankomst 09.00 og avgang 17.00.

MS Artania er eit cruiseskip eigd og operert av det tyske reiseselskapet Phoenix Reisen. Skipet vart opphavleg bygd som Royal Princess for den britiske marknaden og døypt av Lady Diana. Sidan 2011 har det seilt for Phoenix Reisen.

Skipet har utelukkande utvendige kabinar, mange med eiga balkong og panoramavindauge. Om bord finn ein fleire restaurantar, barar, show-lounge, kino, spa- og velværeområde, bibliotek, butikk og treningssenter. Eit klassisk terrasse-hekk og ein rundt-om-promenadedekk gjev panoramautsikt over havet.

MS Artania er eit populært skip på fjordkryssingar og har mellom anna segla i Geirangerfjorden.


Lengde	231 m
Breidd	29 m
Bruttotonnasje	44 500
Passasjerkapasitet	Inntil 1 200
Passasjerdekk	9
Kabinar	600 (alle utvendig)

MS Artania gjekk forbi Hareid i starten av juni 2026. 13. juni legg ho til som fyrste cruiseskip i Hareid kommune nokon sinne Johannes Alme

Tilbod til cruisegjestane 13. juni

Velkomstarrangement 13. juni

Tilbod som blir formidla via reiarlaget sin agent 13. juni

Tilbod som kan bli tilbode på kaia, eller ved seinare cruiseanløp

Tilbod til mannskapet 13. juni

Aktivitetar for alle i sentrum 13. juni

09:00 MS Artania legg til kai
Velkomstseremoni på kaia med mottaking av ordførar. Overrekkinga av gåve. Hjørungavåg brass spelar når skipet legg til kai Corsonus syng for gjestane. Dette arrangementet er berre for passasjerar og aktørar.

09:20 Organiserte utflukter for cruisegjestane
Held fram gjennom heile dagen

10:00 Marknadsgate
I Kjøpmannsgata og i parken. Marknad med lokale handverksprodukt, souvenirar, såper, loddsal og mat

Kari Vev og skinnverkstad er ope

10:00- 14:00 Kunstutstilling på kyrkjelydshuset

I fyrste etasje på kyrkjelydshuset i Kjøpmannsgata blir det kunstutstilling med fem lokale kunstnarar. Det er gratis inngang, og fleire av kunstnarane har kunst til sals.

11:00–14:00 Pop-up-scene
På scena i parken. Kor, band, dansegrupper, høgtlesing for barn klokka 12.

11:00–14:00 Open kyrkje med omvisarar
Omvisingar på engelsk kl. 10:30, 11:30 og 12:30.

12:00 Kaffi og kor
Morgonkonsert med Corsonus i kyrkjelydshuset, inkludert kaffi og kake

12:00 Hadarleikane
På Hareid stadion. Friidrettsarrangement for barn og unge. Publikum er velkomne.

13:00 Mat og arkeologi
Samarbeid mellom arkeolog Arve Nytun og Millennium Kafé.

17:00 MS Artania drar vidare

Her kan du lese meir om programmet.

Parkering 13. juni

Det vil vere mogleg å stå lenger enn to timar gratis på følgande oppmerka parkeringsplassar i Hareid sentrum:

Rådhusplassen – også der det er merka med tilsettparkering
Kyrkja, både ved porten og på bortsida av kyrkjegarden
I Isakdalen, bak Kjøpmannsgata
På Coop-taket
På Hareid barneskule
Nedsida av sjukeheimen

Det er også god plass ved Hareid skule og Hadarhallen.

Parkeringsplassane der det er betaling i dag, vil ikkje vere gratis.

Fritaket for maks to timar gjeld ikkje på parkeringsplassane utanfor butikkane

Du kan lese meir om kvifor vi forlenger parkeringsperioden her her.

Kart over parkeringsplassar der 2-timarsregelen ikkje gjeld 13. juni

Kaifasilitetar

Cruiseskip-besøk i 2027

Cruiseskip-besøk i 2028

Les meir om cruise-satsinga

Publisert 10.06.2026 23:14

Sist endra 12.06.2026 11:47