Kristina Push Folkestad prøver om sykkelhjelmen på dottera Amalia. Bak disken står Geir Slotsvik og Irene Lovise Johansen frå Lions.
Erlend Friestad
– Det er veldig bra å få låne sykkel. Den vi har heime er øydelagd, og vi har ikkje rekt å få reparert han. Dottera mi har sykkeltur med skulen kvar veke. Då er det godt å sleppe å reise til Ulsteinvik for å låne, seier Kristina Push Folkestad.
Ho og dottera Amalia har allereie teke i bruk BUA Hareid, og set stor pris på at tilbodet no finst lokalt.
– Vi har brukt BUA i Ulsteinvik før, så det er veldig kjekt at tilbodet no er mykje nærare, forklarer dei.
BUA Hareid opna rett før påske, og mange innbyggjarar har allereie vore innom for å låne sports- og fritidsutstyr – heilt gratis. Tilbodet er for alle, men er særleg nyttig for barnefamiliar og ungdom.
Geir Slotsvik og Irene Lovise Johansen er to av frivillige som gjer det mogleg å drive BUA på Hareid.
Erlend Friestad
Frivillige gjer tilbodet mogleg
Ein viktig grunn til at BUA Hareid har fått ein så god start, er innsatsen frå dei frivillige. Lions har tatt ansvar for torsdagane, og det er vi svært glade for.
– Dette er eit veldig bra tilbod, og mange set stor pris på at vi har det. Det var travelt før påske, med mykje justering av ski og tilpassing av utstyr. Vi prøver alltid å hjelpe brukarane med å finne utstyr som passar, Geir Slotsvik og Irene lovise Johansen frå Lions som hadde torsdagsvakta førre veke.
– Vi hjelper med å tilpasse utstyr til brukarane, og det er kjekt å sjå kor mykje det betyr. Det blir ofte trøkk før langhelger, men vi opplever at det er nok utstyr til alle, seier dei.
Frå ski før påske til vår- og sommarutstyr
Før påske var det mange som lånte ski, både langrenn og slalåm. No er vintersesongen over, og skia er sett på lager. I staden er BUA fylt opp med vår- og sommarutstyr.
– Syklar er det mest populære no, men vi låner også ut alt frå fiskehåvar og fotballar til telt, soveposar, termosar, stormkjøken og hengekøyer. I tillegg har vi ulike aktivitetsutstyr som skateboard, boccia, golfutstyr og kubb, seier ungdomsarbeidar i Hareid kommune, Renate Seljeseth Bøe.
– Eit tilbod som skaper bulyst
Kulturleiar i Hareid kommune, Melinda Skeide, er svært nøgd med oppstarten.
– Vi er veldig fornøgde med starten på BUA Hareid. Mange har vore innom for å låne utstyr, og vi får gode tilbakemeldingar. Dette er eit tilbod som både fremjar aktivitet, fellesskap og bulyst, og som senkar terskelen for å vere med, seier ho.
Ho understrekar også kor viktig samarbeidet med dei frivillige har vore.
– Utan dei frivillige hadde dette ikkje vore mogleg å halde eit godt og inkluderande tilbod ope for alle. Vi er svært takksame for engasjementet og innsatsen dei legg ned, seier Skeide.
BUA Hareid håpar endå fleire vil ta i bruk tilbodet framover.
For praktisk informasjon om opningstider, utlån og kva utstyr du kan låne, kan du lese meir her:
Når har de ope?
Vi har ope følgande, faste tidspunkt:
- tysdagar klokka 14-16
- torsdagar klokka 18-20
Endringar i opningstid, til dømes stenging eller ekstra opningstid, vil bli annonsert her og i kommunen sine andre kanalar.
Kva utstyr har de på BUA?
På BUA kan du låne eit stort utval av utstyr til både sommar, vinter, leik og friluftsliv. I hyllene finn du alt frå syklar og ski til telt og spel. Her er noko av det du kan låne:
Friluftsliv og camping:
- Telt, lavvo, soveposar og liggeunderlag
- Stormkjøken, termosar, tursekkar og kompass
- Hovudlykter og hengekøyer
Vinter og is:
- Langrennsski, fjellski, slalomutstyr og akematter
- Hockey- og kunstløpskøyter
- Truger, broddar, alpinhjelmar og hockeykøller
Sommar og vatn:
- Syklar og sykkelhjelmar
- Flytevestar og redningsvestar
- Fiskesett, håv og sjøkikkert
- Badminton, volleyball, fotball og basketball
- Skateboard, boccia, golfsett og meir
Leik og spel:
- Stigegolf og frisbeegolf
- Kubb og ulike ballspel
Korleis låner eg?
- For å låne utstyr gjennom BUA-nettverket må du ha bustadadresse i Norge, norsk mobilnummer og opprette ein låneprofil.
- Når du opprettar ein låneprofil, må du verifisere personopplysningane dine med Vipps. Viss du ikkje har Vipps, kan du verifisere mobilnummeret og e-postadressa ved å få tilsendt ei kode og vise fram legitimasjon første gang du skal låne. Når du kjem for å låne treng du berre å oppgi mobilnummeret ditt.
- Opprett låneprofil her.
Kan barn låne?
Barn og ungdom under 18 år kan låne gjennom BUA-nettverket, men ein myndig person må være ansvarleg for lånet. Den vaksne må opprette ein låneprofil og legge til mindreårige som medlåntakar, med eige mobilnummer og e-postadresse. Born som ikkje har eiga e-postadresse og mobilnummer, kan låne gjennom foreldra sin låneprofil dersom foreldra skriv det i notatfeltet i sin låneprofil.
Kor mykje kostar det?
Det er gratis å låne!
(Men du kan få gebyr om du levere for seint eller øydelegg utstyret).
Kor lenge kan eg låne utstyret?
Du kan låne utstyret i inntil 7 dagar. Etter at det utstyret er levert tilbake, må det gå minst éi veke før det kan lånast på nytt. Dette gjeld for alle personar i same hushald.
Dersom du ikkje leverer utstyret tilbake i tide, blir det lagt på gebyr på 200 kroner per opningsdag. Ved gjenteke brot kan du mellombels miste retten til å låne utstyr.
Kva reglar gjeld for utstyret?
Utstyret skal du levere tilbake i tide, på same stad som du henta det, og i same stand som då du fekk det. Normal slitasje er tillaten. Du skal levere utstyret reint og klart til vidare bruk, slik at den neste som låner det får ei god oppleving.
Det er ikkje lov at du:
- låner ut utstyret vidare til andre
- bruker det til kommersielle føremål
- fraktar det utanfor Noreg
Du har sjølv ansvar for utstyret så lenge du har lånt det.
Dersom utstyret blir skada eller tapt utover normal slitasje, kan BUA krevje erstatning for reparasjon eller erstatning. Erstatninga blir vanlegvis rekna ut frå verdien på utstyret minus omlag 20 prosent på grunn av slitasje.
Fleire spørsmål?
Dersom du framleis har spørsmål som du ikkje har fått svar på, kan du kontakte BUA på e-post:
bua@hareid.kommune.no