Det er kommunestyret som skal gjere endeleg vedtak. 

Kort om framlegget

Framlegget frå formannskapet inneheld fleire tiltak for å effektivisere drifta i kommunen.

I sektor for læring og kultur blir det foreslått å redusere tre årsverk ved ressurssenteret, som i dag handterer vaksenopplæring og introduksjonsprogram. Dette skjer som følgje av vedtaket om å busette færre flyktningar i 2026. Det blir også peikt på at Hareid skule kan avlastast ved å justere krinsgrenser eller flytte elevar til andre skular. I tillegg vurderer ein å organisere språkopplæringa på ein ny måte, mellom anna gjennom eigne klasser for minoritetsspråklege elevar.

I sektor for velferd ønskjer formannskapet å intensivere omstillingsprosjekt og planlegge bukollektiv for å nytte ressursane meir effektivt. Dei førslår også å modernisere turnusordningar og betre kontrollen på vaktlister for å redusere overtid og vikarbruk.

For den tidlegare sektor for samfunnsutvikling ligg det inne forslag om å redusere årsverk som del av omstillingsprosjekt, samt gjennomføre innsparing i eigedom- og samfunnskontoret. Hareid mottak skal auke inntektene ved å ta inn fleire bebuarar utan å auke bemanninga.

Sentraladministrasjonen skal effektivisere ved å omprioritere oppgåver og redusere kostnader knytt til kjøp av tenester. Det blir også lagt fram eit verbalforslag om å kutte godtgjersler til politiske representantar, der midlane skal gå til tiltak for barn og unge.

I tillegg til innsparingstiltaka inneheld forslaget nokre reverseringar, samanlikna med kommunedirektøren sitt framlegg. Formannskapet ønskjer ikkje å legge ned skular, og vil oppretthalde dagsentertilbodet for eldre. Dei er heller ikkje villige til å auke eigedomsskatten. For barn og unge blir det foreslått å sikre ungdomsklubben, barnefestivalen og kulturaktivitetar.

Eventuelle ekstra midlar frå staten skal gå uavkorta til nedbetaling av tidlegare års meirforbruk. Målet med heile pakken er å redusere utgiftene, handtere høg lånegjeld og samtidig oppretthalde viktige tenester for innbyggarane.

Her er heile forslaget som blei vedteke av formannskapet.

Her kan du sjå møtet i formannskapet

Budsjettsaka startar frå om lag 1 time og 44 minutt ut i sendinga.

Slik sender du innspel:

Det er fyrst no den “formelle” høyringsperioden startar. Vi har likevel oppmoda innbyggarar om å engasjere seg før formannskapet fatta sitt vedtak. Då kunne formannskapet få innspel i forkant. Mange av innspela som kom inn før formannskapet kom med sitt forslag, er no gjort irrelevante. Svært mange handla om endring av skulestruktur - ei sak som er teke ut av formannskapet sitt forslag. Desse innspela ligg likevel tilgjengeleg i lista over innspel.

Du kan sende innspel via dette skjemaet.

Høyringsfrist 10. desember klokka 16.

Tysdag 2. desember klokka 18 inviterer dei folkevalde til folkemøte om budsjettframlegget til formannskapet.

Les andre sine innspel