Andreas Moldskred har gått Rotarystien med stoppeklokke for å rekne på kor lang tid turistane vil bruke på den guida turen han og Sverre Jarl Ulstein skal ha for cruiseturistane som kjem 13. juni.
Erlend Friestad
– Eg så fyrst føre meg å guide turistane opp på Håbakknotten, men for folk som ikkje er vande med å gå i terreng, blei det vanskeleg. Så blei eg oppmoda om å samarbeide med Hareid Rotaryklubb om å guide på Rotarystien, og tende på den ideen, fortel Andreas Moldskred som har utvikla tilbodet. Saman på turen vil han også ha med seg Rotary-sti-«general» Sverre Jarl Ulstein.
Moldskred har hatt god dialog med shore-ex-agenten til cruisereiarlaget for å utvikle og tilpasse tilbodet til cruisegjestane sine ønske og behov.
- Anne Klyve Olsen i Olsen Cruise Service var ei fantastisk dame å snakke med. Vi har fått gode innspel til struktur og tidsbruk på turen. Her skal ting passe på minuttet, seier Moldskred og viser fram stoppeklokka han har rundt halsen.
Den har han gått med i fleire rundar ned stien for å sjå kor mykje tid dei skal bruke på kvar av etappane. 70 meter i minuttet er fasiten – totalt med alle stoppa og ein lenger matpause, vil turen ta 3,5 timar.
LES OGSÅ: Cruise-satsinga gir inntekstmoglegheiter for lokalsamfunnet
Natur, kultur og historie
Tilbodet har tydelegvis treft noko hos dei tyske turistane som kjem med cruiseskipet MS Artania. Rotary-sti-turen er fullbooka. To turar skal Moldskred og Ulstein ta med 26 deltakarar i kvar gruppe.
- Så får vi sjå på responsen om det er noko vi kan halde fram med når dei neste skipa kjem i 2027, seier Moldskred.
Deltakarane blir køyrde med buss frå kaia på Indre-Hareid og til Kaldholen. Der går dei fyrst inn til Kaldholdemninga før dei går tilbake til skipet på Rotary-stien. Undervegs skal dei ha fleire stopp der Moldskred og Ulstein fortel om natur, kultur og historia knyt til vassdraget.
– Eg vaks opp i området og har brukt dette landskapet sidan eg var liten. Det gir ein ekstra dimensjon å kunne fortelje frå eigne erfaringar i tillegg til det historiske, seier han.
Fyrste stopp bli rasteplassen nær vestenden av Grimstadvatnet. Her er det naturreservatet som blir tema. Det er registrert nær 200 fugleartar her, mellom anna Noreg sin nasjonalfugl fossekallen
Torvløa blir neste stopp og turistane får vite om torvspainga som var heilt naudsynt for å skaffe nok brensel fram til elektrisitet blei den vanlegaste oppvarmingsformen.
Brennsnut og spikekjøt
Ved den store gapahuken ved Grimstadvatnet blir det servert brennsnut, spikemat og historia om reguleringa av vassdraget.
Vidare går turen til Mjølkebrua der Moldskred fortel om elvemuslingane og perlefisket.
På dei siste stoppa legg blir det lagt vekt på næringslivet langs vassdraget, med forteljingar om Hareid elektrisitetsverk, kvernhuset og stampemølla.
- Dersom det er nok vassføring i elva skal vi få i gang kverna slik at deltakarane får sjå ho i aksjon, fortel Moldskred.
Fleire besøk
I år kjem berre MS Artania, men allereie i 2027 har talet på cruiseanløp auka til 5. Det har også kome bestillingar for 2028.
Derfor har vi satsa på cruiseturisme
Bakgrunnen for at vi satsar på cruiseturisme, er eit ønske om å skape meir inntekter til kommunen. Vi har nytta eksisterande fortrinn på ein kontrollert og berekraftig måte utan store investeringar. Vi nyttar eksisterande infrastruktur, kapasitet og kompetanse, og har etablert eit godt samarbeid med eigarane av kaia vi skal nytte.
Vi legg mykje vekt på lokal verdiskaping. Kvar cruisegjest legg igjen om lag 800-1200 kroner lokalt, så her har butikkar og restaurantar gode moglegheiter. I tillegg ser vi at det alt har ført til fleire nyetableringar i kommunen. Dette er tilbod som også er positive alle som bur i kommunen. Også frivillige organisasjonar og andre kan skaffe seg gode inntekter ved å setje opp buer i Kjøpmannsgata under cruisebesøka.
Dei neste åra vil det også kome strenge miljøkrav for passasjerskip som skal inn i verdsarvfjordane våre. Hareid kommune ligg strategisk til utanfor verneområda og kan derfor ta imot skip som ikkje har høve til å gå lenger inn i fjordsystemet.
Cruiseskip-besøk 13. juni 2026: MS Artania
Forventa ankomst 09.00 og avgang 17.00.
MS Artania er eit cruiseskip eigd og operert av det tyske reiseselskapet Phoenix Reisen. Skipet vart opphavleg bygd som Royal Princess for den britiske marknaden og døypt av Lady Diana. Sidan 2011 har det seilt for Phoenix Reisen.
Skipet har utelukkande utvendige kabinar, mange med eiga balkong og panoramavindauge. Om bord finn ein fleire restaurantar, barar, show-lounge, kino, spa- og velværeområde, bibliotek, butikk og treningssenter. Eit klassisk terrasse-hekk og ein rundt-om-promenadedekk gjev panoramautsikt over havet.
MS Artania er eit populært skip på fjordkryssingar og har mellom anna segla i Geirangerfjorden.
| | |
|---|
| Lengde | 231 m |
| Breidd | 29 m |
| Bruttotonnasje | 44 500 |
| Passasjerkapasitet | Inntil 1 200 |
| Passasjerdekk | 9 |
| Kabinar | 600 (alle utvendig) |
Tilbod til cruisegjestane 13. juni
Velkomstarrangement 13. juni
Sidan dette er vårt første cruiseanløp gjer vi litt ekstra stas på skipet og gjestane. På eit lukka inngjerda område i kaiområdet (pga. ISPS-reglar) vil gjestane bli tatt imot av representantar frå Hareid kommune, Hjørungavåg Brass, Corsonus og lokale vikingar.
Tilbod som blir formidla via reiarlaget sin agent 13. juni
- Besøk på Ishavsmuseet med historieforteljing
- Guida tur med Polarstar til monumentet på Overåsanden og til Kvitneset
- Besøk hos Hodr Hjørungavåg Vikingsete med historieforteljing, omvising og aktivitetar ute
- Besøk på Eliasgarden med historieforteljing og ulike aktivitetar
- Guida tur på Rotarystien
- Panoramatur med buss og guiding
- Båttur innover fjordane
Tilbod som kan bli tilbode på kaia, eller ved seinare cruiseanløp
- Guida tur til Håbakknotten
- Guida tur med arkeolog på Overå
- Besøk, konsert og historieforteljing i Hareid kyrkje
- Konsert med Corsonus
- Tur til Runde
- Besøke Hareid Sauna
- Medlemskap i Explorers Club
- Golf og fotballgolf hos Sunnmøre Golfklubb
- Lokalmat ilag med kokk på Millenium Kafé
Tilbod til mannskapet 13. juni
Lokala til Hareid ungdomsklubb vil bli nytta av mannskapet. Her kan dei slappe av, vere på nett og elles nytte biljard, bordtennis og ulike spel. Det vil også bli vist bilete frå Hareid på storskjermen. Saunaen vil også vere reservert til mannskapet. Viss vêret tillet det vil vi tilby ein guida fjelletur.
Parkering 13. juni
Det vil vere mogleg å stå lenger enn to timar gratis på følgande oppmerka parkeringsplassar i Hareid sentrum:
- Rådhusplassen – også der det er merka med tilsettparkering
- Kyrkja, både ved porten og på bortsida av kyrkjegarden
- I Isakdalen, bak Kjøpmannsgata
- På Coop-taket
- På Hareid barneskule
- Nedsida av sjukeheimen
Det er også god plass ved Hareid skule og Hadarhallen.
Parkeringsplassane der det er betaling i dag, vil ikkje vere gratis.
Fritaket for maks to timar gjeld ikkje på parkeringsplassane utanfor butikkane
Du kan lese meir om kvifor vi forlenger parkeringsperioden her her.
Kart over parkeringsplassar der 2-timarsregelen ikkje gjeld 13. juni
Cruiseskip-besøk i 2027
Vi har per no fem planlagde besøk i 2027. Dato og skip blir lansert på eit seinare tidspunkt.
Cruiseskip-besøk i 2028
Den første bestillinga for 2028 har allereie kome. Dato og skip blir lansert på eit seinare tidspunkt.
Les meir om cruise-satsinga